ముంబైతోనే హార్దిక్? కానీ కెప్టెన్‌గా కాదు.. కొత్త సారథి రేసులో హైదరాబాదీ ప్లేయర్!

ఐపీఎల్ వర్గాల్లో కొన్ని నెలలుగా హాట్ టాపిక్‌గా మారిన స్టార్ ఆల్-రౌండర్ హార్దిక్ పాండ్యా ట్రేడింగ్ వ్యవహారంలో కీలక పరిణామం చోటుచేసుకుంది. తాజా సమాచారం ప్రకారం హార్దిక్ పాండ్యా ఐపీఎల్ 2027 సీజన్‌లో కూడా ముంబై ఇండియన్స్‌ (ఎంఐ) జట్టుతోనే కొనసాగే అవకాశాలు కనిపిస్తున్నాయి. అయితే, అతనికి కెప్టెన్సీ బాధ్యతలు మాత్రం దక్కకపోవచ్చని తెలుస్తోంది. 'టైమ్స్ ఆఫ్ ఇండియా' ప్రచురించిన ఒక కథనం ప్రకారం, హార్దిక్ ట్రేడింగ్ కోసం జరిపిన చర్చలు ఇప్పటివరకు ఫలించకపోవడంతో అతడిని జట్టులోనే కొనసాగించే దిశగా యాజమాన్యం ఆలోచిస్తోంది.

కొత్త కెప్టెన్ వేటలో ముంబై యాజమాన్యం
ముంబై ఇండియన్స్ ఫ్రాంచైజీ కొత్త కెప్టెన్ నాయకత్వంలో ముందుకు సాగాలని నిర్ణయించుకున్నట్టు సమాచారం. జట్టుకు ఐదు టైటిళ్లు అందించిన రోహిత్ శర్మ, మళ్లీ కెప్టెన్సీ బాధ్యతలు స్వీకరించడానికి సుముఖంగా లేడు. అయితే, తదుపరి సారథి ఎంపిక కోసం జరుగుతున్న చర్చల్లో అత‌డు చురుగ్గా పాల్గొంటున్నాడ‌ని ఆ కథనం పేర్కొంది. ప్రస్తుతం కొత్త కెప్టెన్ రేసులో యువ ఆటగాడు, హైదరాబాదీ ప్లేయర్ తిలక్ వర్మ పేరు ప్రముఖంగా వినిపిస్తోంది. అతనితో పాటు సీనియర్ పేసర్ జస్‌ప్రీత్ బుమ్రా పేరును కూడా యాజమాన్యం పరిశీలిస్తోంది. ప్రస్తుతానికైతే తిలక్ వర్మకే ఎక్కువ అవకాశాలు ఉన్నట్టు తెలుస్తోంది.

ఫలించని ట్రేడింగ్ చర్చలు
హార్దిక్ పాండ్యా ట్రేడింగ్ విషయానికొస్తే, ముంబై యాజమాన్యం కోల్‌కతా నైట్ రైడర్స్‌తో (కేకేఆర్‌) చర్చలు జరిపింది. ఈ చర్చల్లో భాగంగా ఆస్ట్రేలియా ఆల్-రౌండర్ కామెరాన్ గ్రీన్‌ను ఇచ్చేందుకు కేకేఆర్ ఆసక్తి చూపింది. అయితే, వచ్చే ఏడాది గ్రీన్ వర్క్‌లోడ్‌పై ఉన్న సందేహాల కారణంగా ముంబై ఇండియన్స్ ఈ డీల్‌కు అంగీకరించలేదని సమాచారం. మరోవైపు, చెన్నై సూపర్ కింగ్స్ (సీఎస్‌కే) తమ కొత్త హెడ్ కోచ్‌ను నియమించుకున్న తర్వాత వారితోనూ చర్చలు జరిపే అవకాశం ఉంది. "ఒక ఆటగాడి ట్రేడింగ్ జరగాలంటే చాలా అంశాలు కలిసిరావాలి. అందుకే ఈ ప్రక్రియ అంత సులభం కాదు. బహుశా అతడిని ట్రేడ్ చేయకపోవచ్చు. ఈ విషయంపై ఆటగాడితో కూడా చర్చలు జరిగాయి" అని ఈ పరిణామాలను గమనిస్తున్న వర్గాలు వెల్లడించినట్టు ఆ కథనం పేర్కొంది.

సూర్యకుమార్, జయవర్ధనే భవితవ్యంపై స్పష్టత
గత 2026 సీజన్‌లో పేలవ ఫామ్‌తో ఇబ్బందిపడిన స్టార్ బ్యాటర్ సూర్యకుమార్ యాదవ్‌ను ముంబై ఇండియన్స్ అట్టిపెట్టుకోనుంది. కేవలం ఒక సీజన్ ప్రదర్శన ఆధారంగా ఆటగాళ్లను వదులుకోవడం ముంబై పనితీరు కాదని, 'వన్ ఫ్యామిలీ' అనే ట్యాగ్‌కు కట్టుబడి ఉంటామని యాజమాన్య వర్గాలు స్పష్టం చేశాయి. దీంతో సూర్యకుమార్ ఐపీఎల్ 2027లో కూడా ముంబై తరఫునే ఆడటం ఖాయమైంది. అలాగే, హెడ్ కోచ్ మహేల జయవర్ధనే కూడా తన పదవిలో కొనసాగనున్నాడు.

2027 ఐపీఎల్ సీజన్ తర్వాత మెగా వేలం జరగనుండటంతో, జట్టులో భారీ మార్పులు చేయడానికి ఫ్రాంచైజీలు వెనుకాడుతున్నాయి. ఈ నేపథ్యంలో ముంబై ఇండియన్స్ కూడా సమూల మార్పులకు బదులు, స్థిరత్వానికే ప్రాధాన్యత ఇస్తూ ఆచితూచి అడుగులు వేస్తున్నట్టు స్పష్టమవుతోంది.